მექსიკაში განმეორებითი მიწისძვრა მოხდა. ინფორმაციას ბრიტანული გამოცემა independent-ი ავრცელებს. 6,2 სიმძლავრის მიწისქვეშა ბიძგები ქვეყნის სამხრეთ ნაწილში, ოახასას შტატში დაფიქსირდა.

CBS-ის ინფორმაციით, განმეორებითი მიწისძვრა ქვეყნის დედაქალაქშიც მოხდა. სეისმოლოგების ინფორმაციით, რიხტერის შკალის მიხედვით მიწისძვრის სიმძლავრე 4.1-დან 5.8-მდე მერყეობდა.

 დაშავებულთა შესახებ ინფორმაცია ამ დრომდე არ გავრცელებულა.

19 სექტემბერს მექსიკის ქალაქ პუებლა-დე-სარაგოსის მახლობლად 7,1 მაგნიტუდის სიმძლავრის მიწისძვრა მოხდა. მიწისძვრამ ძლიერი ნგრევა გამოიწვია. ქვეყანაში სამდღიანი გლოვა გამოცხადდა.

მექსიკაში მომხდარი მიწისძვრის შედეგად დაღუპულთა რიცხვმა უკვე 295-ს მიაღწია. მაშველები გადარჩენილთა ძებნას ამ დრომდე აგრძელებენ.

ამ თვეში ეს უკვე მესამე მიწისძვრაა. 8 სექტემბერს მექსიკის წყნარი ოკეანის სანაპიროზე 8 მაგნიტუდის სიმძლავრის მიწისძვრა მოხდა.

აღსანიშნავია, რომ ზუსტად 32 წლის წინ, 1985 წლის ამავე დღეს, 19 სექტემბერს, მეხიკოში 8.0 მაგნიტუდის სიმძლავრის მიწისძვრა მოხდა. სტიქიას მაშინ, სულ მცირე, 5000 ადამიანის სიცოცხლე ემსხვერპლა.