პრემიერ-მინისტრმა გიორგი კვირიკაშვილმა მთავრობის დღევანდელ სხდომაზე რთველის შესახებ ისაუბრა. პრემიერმა "რთველი 2017" წარმატებულად შეაფასა და მადლობა გადაუხადა რთველის საკოორდინაციო შტაბს.

„რთველი 2017 დამთავრდა ძალიან წარმატებულად. დღევანდელი მონაცემებით, მხოლოდ კახეთის რეგიონში 125 000 ტონამდე ყურძენი გადამუშავდა და მევენახეების შემოსავალმა 143 მილიონი ლარი შეადგინა. ეს არის ნამდვილად თითოეული მევენახის, გლეხის და მთლიანად საქართველოს და, რა თქმა უნდა, ხელისუფლების წარმატება. რთველის პროცესში ჩართული იყო 230 კომპანია და ყურძენი კომპანიებს 15 000-მდე მევენახემ ჩააბარა. მთელი ეს პროცესი იყო ძალიან ორგანიზებული. მევენახეები და მეწარმეები ფასზე სახელმწიფოსგან დამოუკიდებლად შეთანხმდნენ და ფასი განისაზღვრა ადგილწარმოშობის, ხარისხის და სხვა ფაქტორების მოთხოვნაზე დაფუძნებით. მინდა, მადლობა გადავუხადო რთველის საკოორდინაციო შტაბს, კონკრეტულად მინისტრს ლევან დავითაშვილს გადავუხადო მადლობა ძალიან ორგანიზებულად და წარმატებულად ჩატარებული რთველისთვის“,- განაცხადა გიორგი კვირიკაშვილმა.