ქართველი ფეხბურთელის გურამ კაშიას მიერ ჰოლანდიაში ერთ-ერთ მატჩზე ლგბტ ფერებიანი სამკლაურით გამოჩენის თემამ საქართველოში საზოგადოების გარკვეულ ჯგუფებში გაღიზიანება გამოიწვია.

საზოგადოების ნაწილმა გურამ კაშია ლგბტ პროპაგანდაში დაადანაშაულა, ნაწილმა კიმას სოლიდარობა გამოუცხადა. „ქართულმა მარშმა“ გურამ კაშიას საქართველოს ეროვნული ნაკრებიდან გარიცხვის მოთხოვნით ფეხბურთის ფედერაციასთან აქცია გამართა, გუშინ კი „ქართული მარშის“ წევრები ტელეკომპანია “რუსთავი 2“-თან მივიდნენ და მათ ლგბტ თემის  პროპაგანდაში დასდეს ბრალი. ორივე აქციაზე ისმოდა ჰომოფობიური განცხადებები  და გინება.

ჩვენ დავინტერესდით წამყვანი ტელეკომპანიების გადაცემების ავტორების და ჟურნალისტების პოზიციით, უნდა გაშუქდეს თუ არა და როგორ, ისეთი ღონისძიებები, რომლებიც გაჯერებულია აგრესიით, სიძულვილის ენითა და  ჰომოფბიური განცხადებებით.

ლევან ჩხაიძე გადაცემა „ცენზურის გარეშე“:

„არ დავუთმობდი მათ ეთერს. არც მიზანი ჩანს, ვერ გავიგე სიმართლე გითხრათ. ამ ფორმით სათქმელის თქმა არის არასწორი. რასაც ისინი აკეთებენ, ჩემი აზრით, პირიქით უკურეაქცას იწვევს. არ არის ეს ისეთი განსაკუთრებული პრობლემა, რომ ავდგეთ და გინდა თუ არა, მაინცდამაინც, დიდი დოზით დავუთმოთ ეთერი. თუ საჭირო იქნება, ვერც იმის პრობლემას ვხედავ, რომ დასხდნენ ადამიანები და ამ თემაზე ისაუბრონ, თუნდაც იკამათონ ცხარედ, მაგრამ მივარდნა, სროლები....ძალიან მიუღებელია. ვფიქრობ, რომ რასაც აპროტესტებენ, ზუსტად იმას უწევენ ყველაზე დიდი პროპაგანდას იმით, როგორც იქცევიან“.