ჩეჩნეთის პრეზიდენტის რამზან კადიროვის 18 წლის ქალიშვილმა, აიშათ კადიროვამ გროზნოს ცენტრში ქალის ეროტიკული საცვლების და ინტიმური აქსესუარების მაღაზია Lady A გახსნა. ამის შესახებ „ბი ბი სის“ რუსული სამსახური წერს.

"რეგინფოს" ინფორმაციით, მაღაზიის საზეიმო გახსნის შესახებ პოპულარულმა ჩეჩენმა ბლოგერებმა დაწერეს. მაღაზია ვიწრო წრეში რეკლამდება და სოციალურ ქსელში გამოქვეყნებული ზოგიერთი ფოტო და ვიდეომასალა „ბი ბი სის“ სტატიის გამოქვეყნების შემდეგ წაიშალა.

მაღაზიაში ცნობილი ამერიკული და ევროპული, ქალის თეთრეულის ბრენდების პროდუქცია იყიდება. Lady A ქალებს მოუწოდებს, უფრო თამამები იყვნენ.

ჩეჩნეთში, სადაც სექსი ტაბუდადებული თემაა და რამზან კადიროვი ქალებს მოუწოდებს კონსერვატიულად მოიქცნენ, ასეთი მაღაზიის გახსნას არაერთგვაროვანი რეაქცია მოჰყვა. როგორც „ბი ბი სი“-ს უთხრეს, უკმაყოფილება იმან გამოიწვია, რომ მაღაზია კადიროვის ქალიშვილს ეკუთვნის.

„ერთი მხრივ, რადგან ასეთი მაღაზია გახსნეს, ესე იგი მოთხოვნაც არსებობს. მეორე მხრივ კი ეს შეურაცხმყოფელია იმის გათვალისწინებით თუ როგორი ქალბატონების პროპაგანდა ხდება. ჩვენ ხომ გვასწავლიან როგორი უნდა იყოს ჩეჩენი ქალი, რას უნდა აკეთებდეს. ჩვენ ცხოვრებას გვასწავლიან, გვასწავლიან, რომ მორჩილები და დამჯერები უნდა ვიყოთ. თუ ჩეჩენი ქალები სექსუალურებიც უნდა იყვნენ, ჩნდება კითხვა. გამოდის, რომ კადიროვებს ჩვენთან ასეთი დამოკიდებულება აქვთ: ჩვენთვის ერთია, თქვენთვის მეორე. კარგი იქნებოდა თუ ჩამოყალიბდებოდნენ“, - უთხრა „ბი ბი სის“ ერთ-ერთმა რესპონდენტმა.

აიშათ კადიროვა ისლამური მოდის სახლ Firdaws-ს მმართველიც არის. ეს ბრენდი ქალის დახურულ ტანსაცმელს კერავს, რომელიც ტრადიციული ჩეჩნური ელემენტებით არის გაფორმებული. ერთ-ერთ ინტერვიუში აიშათმა მუსლიმური მოდა ასე დაახასიათა: „ტრადიციები, ელეგანტურობა და მოკრძალება“.