პირველმა ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა ტყიბულისა და ქუთაისის საავადმყოფოებში მინდელის შახტაში მომხდარი შემთხვევის შედეგად დაშავებული მეშახტეები მოინახულა. 

საქართველოს ეკონომიკისა და მდგრადი განვითარების სამინისტროდს ინფორმაციით, დიმიტრი ქუმსიშვილმა დაღუპულთა ოჯახებს სამძიმარი გამოუცხადა და აღნიშნა, რომ სახელმწიფო დაღუპულთა ოჯახების დასახმარებლად ყველაფერს გააკეთებს. 

„სამწუხაროდ, დღეს გამთენიისას უდიდესი ტრაგედია მოხდა. მინდა სამძიმარი გამოვუცხადო ოჯახის წევრებს, რომლებმაც დაკარგეს თავიანთი შვილები, ძმები, მამები. ჩვენ გავაკეთებთ ყველაფერს, რათა მაქსიმალურად მივეხმაროთ დაღუპულთა ოჯახებს ყველაფერში“, - განაცხადა დიმიტრი ქუმსიშვილმა. 

წინასწარი ინფორმაციით, 5 აპრილს, მინდელის შახტაში, დაახლოებით, 03:45 საათზე, დასავლეთის მე-10 ველში, პირველ ნახშირმომპოვებელ უბანში, სავარაუდოდ, მოხდა ე.წ. სამთო დარტყმა (გვირაბის გვერდითი ქანების ჩამოშლა, რომელსაც ახლავს ჰაერის დარტყმითი ტალღის გავრცელება), რის შედეგად ექვსი ადამიანი გარდაიცვალა და სამი დაშავდა.

მომხდარ ფაქტთან დაკავშირებით გამოძიება საქართველოს სსკ-ს 240-ე მუხლის მეორე ნაწილით დაიწყო, რაც სამთო, სამშენებლო ან სხვა სამუშაოების წარმოებისას უსაფრთხოების წესების დარღვევას გულისხმობს.