სოფელ ჭუბერში მეორე დღეა ადიდებული მდინარე ნენსკრა ნაპირზე მდგომ სახლებს აზიანებს.
როგორც პრაიმტაიმის კორესპონდენტი ადგილიდან იუწყება, მდინარემ თითქმის ყველა სახლს, საძირკველი გამოაცალა.
გუშინ, ჭუბერში, სტიქიამ საცხოვრებელი სახლები წალეკა. წაღებულია ექვსი ხიდი. მთელი დღის განმავლობაში მოსახლეობის ევაკუაცია მიმდინარეობდა. ადგილზე უწყვეტ რეჟიმში მუშაობენ სამაშველო სამსახურის ბრიგადები.
უხვი ნალექის შედეგად, სოფელ ჭუბერში მთის ნაწილის ჩამოშლამ მდინარე ნენსკრას ადიდება გამოიწვია. მდინარის კალაპოტიდან გადმოსვლის გამო დაიტბორა მიმდებარე ტერიტორია. ჩამოწოლილმა მეწყერმა და მოვარდნილმა ღვარცოფმა გამოიწვია სოფლებთან დამაკავშირებელი ხიდების დაზიანება.
