ჩვენ ტყის ხანძრების ქრობის ახლებური მეთოდი დავნერგეთ. თქვენი გამოცდილებიდან გამომდინარე, შევქმენით ე.წ. ღამისმქრობელთა ჯგუფები, რომლებიც ხანძარს ღამის განმავლობაშიც აქრობენ - ამის შესახებ გიორგი მღებრიშვილმა თურქეთის სოფლის მეურნეობისა და ტყის სამინისტროს, ტყის საკითხთა გენერალურ გენერალური დირექტორთან, ბექირ ქარაჯაბეისთან შეხვედრაზე განაცხადა.
გიორგი მღებრიშვილმა თურქულ მხარეს ტყის ხანძრების სალიკვიდაიცო სამუშაოებში გაწეული დახმარებისათვის კიდევ ერთხელ გადაუხადა მადლობა და სამომავლო თანამშრომლობისათვის მზაობა გამოთქვა.
გიორგი მღებრიშვილი: "ჩვენ ერთ რეგიონში ვცხოვრობთ და დიდი მნიშვნელობა აქვს ერთად ვებრძოლოთ ბუნებრივ გამოწვევებს. ეს რეგიონი ჩვენი საზრუნავია, შეიძლება საქართველოში ეკოლოგიურმა ცვლილებამ თქვენი ქვეყნის ეკოლოგიაზეც იმოქმედოს და პირიქით. ჩვენი სახანძრო-სამაშველო ჯგუფების ერთმა ნაწილმა თურქეთში გაიარა საკვალიფიკაციო კურსები და სწორედ თურქული მხარის დახმარების შემდეგ, ჩვენ ტყის ხანძრების ქრობის ახლებური მეთოდი დავნერგეთ. თქვენი გამოცდილებიდან გამომდინარე, შევქმენით ე.წ. ღამისმქრობელთა ჯგუფები, რომლებიც ხანძარს ღამის განმავლობაშიც აქრობენ. ბოლო ხანძრებმა აჩვენა, რომ ეს ყველაზე ეფექტური მეთოდია".
ბექირ ქარაჯაბეის განცხადებით, თურქული მხარე ყოველთვის მზადაა დაეხმაროს საქართველოს ისეთი დიდი გამოწვევის დამარცხებაში, როგორიც ტყის ხანძრებია.
"მოხარული ვარ, რომ ჩვენს შორის აქტიური თანამშრომლობაა და ეს აუცილებლად გაღრმავდება და გაგრძელდება. შარშანდელმა ტყის ხანძრებმა აჩვენა, თუ რამდენად აქტიურები შეიძლება ვიყოთ ორმხრივ ურთიერთობაში. ჩვენ გვესმის, რამდენად დიდი გამოწვევაა საქართველოსთვის ტყის ხანძრები, ამიტომ მზად ვართ თქვენი სპეციალისტები გადავამზადოთ. ჩვენ შეგვიძლია, რომ გაგიზიაროთ ჩვენი გამოცდილება", - განაცხადა ბექირ ქარაჯაბეიმ.
გიორგი მღებრიშვილი მეორე დღეა თურქეთში ოფიციალური ვიზიტით იმყოფება. საგანგებო სიტუაციების მართვის სამსახურის ხელმძღვანელი ანკარაში კატასტროფებისა და საგანგებო სიტუაციების მართვის სამსახურის ხელმძღვანელობას შეხვდა და თანამშრომლობის ორმხრივი მემორანდუმი გააფორმა. მემორანდუმის გაფორმების შემდეგ, საგანგებო სიტუაციების მართვის კუთხით, საქართველოსა და თურქეთს შორის ურთიერთობა ახალ ეტაპზე გადადის.