დედაქალაქის მერი გერმანიის კანცლერის, ანგელა მერკელის საქართველოში ვიზიტს აფასებს. მისი თქმით, კანცლერის მხრიდან მნიშვნელოვანი განცხადებები გაკეთდა:
„ორი დღის განმავლობაში ჩვენ ვისმენთ მნიშვნელოვან მესიჯებს მისი მხრიდან, რომელიც საქართველოს მხარდაჭერის მიმართულებით გაჟღერდა. საქართველოში მისი ჩამოსვლა უკვე ნიშნავს მხარდაჭერას. მერკელი არა მხოლოდ გერმანიისთვის არის მნიშვნელოვანი პოლიტიკოსი, ევროპაში სერიოზული გავლენა აქვს და გერმანიის, ქალბატონ ანგელა მერკელის მხარდაჭერა არის მნიშვნელოვანი ჩვენთვის იმ რთულ გზაზე, რასაც ევროატლანტიკური სივრცე და ევროკავშირი ჰქვია“,- განაცხადა კახა კალაძემ.
გერმანიის კანცლერი ანგელა მერკელი საქართველოს გუშინ, 23 აგვისტოს ოფიციალური ვიზიტით ეწვია. გუშინ, მერკელი საქართველოს პრემიერ-მინისტრ მამუკა ბახტაძესა და საქართველოს პრეზიდენტ გიორგი მარგველაშვილს შეხვდა. პრემიერმა და გერმანიის კანცლერმა ერთობლივი პრესკონფერენციაც ჩაატარეს. ამის შემდეგ, გერმანიის კანცლერმა საქართველოს ერთიანობისთვის ბრძოლაში დაღუპულ გმირთა მემორიალი გვირგვინით შეამკო და მოგვიანებით, მამუკა ბახტაძემ მას ოფიციალურ სადილზე უმასპინძლა.
დღეს ანგელა მერკელი ოპოზიციას შეხვდა. ამის შემდეგ კი თბილისის ივანე ჯავახიშვილის სახელობის სახელმწიფო უნივერსიტეტში სტუდენტებს ეწვია და მათ შეკითხვებს უპასუხა.
მას შემდეგ, რაც სტუდენტებმა გერმანიიც კანცლერისგან, კითხვებზე პასუხები მოისმინეს, ანგელა მერკელი საოკუპაციო ხაზთან გაემართა. მასთან ერთად იმყოფებიან საქართველოში მყოფი უცხოელი დამკვირვებლები. მერკელმა საოკუპაციო ხაზს მიღმა არსებული ტერიტორიები სოფელ ოძისიდან, ჭოგრიტით დაათვალიერა.
ოფიციალური ვიზიტი საქართველოში დასრულდა. შემდეგი შეხვედრები ანგელა მერკელს სომხეთსა და აზერბაიჯანში ექნება.