"საერთაშორისო სამხრეთ კავკასიური მედიაფორუმზე", რომელიც 4-7 სექტემბერს ტარდება თბილისში, ქართული მედია საშუალებები და ექსპერტებიც დარეგისტრირდნენ. მათი ნაწილი 5 სექტემბრის შეხვედრაში იღებდა მონაწილეობას.

“მითების დეტექტორმა” ღონისძიებაზე რეგისტრირებული ქართული მედია საშუალებების და ექსპერტების სია გამოაქვეყნა:

საზოგადოებრივი მაუწყებელი, 1 არხი - ზვიად ავალიანი,

ტელეკომპანია “ობიექტივი” - ბონდო მძინარიშვილი, ვალერი კვარაცხელია,

Sputnik Georgia - ანასტასია ხატიაშვილი,

“საქართველო და მსოფლიო” - ეკატერინა ნასყიდაშვილი,  სოფია კაკაჩია,

„საქინფორმი“ - არნო ხიდირბეგიშვილი, დიანა შერეშაშვილი,

საინფორმაციო სააგენტოს “პატრიოტი”  - გიორგი ირემაძე

ქართველი ექსპერტები:

არჩილ სიხარულიძე- ექსპერტი, პოლიტიკური ანალიტიკოსი,

გიორგი აბაშიძე, პოლიტოლოგი, ანალიტიკოსი,

მამუკა არეშიძე- პოლიტოლოგი, კავკასიურ საკითხთა ექსპერტი

გულბაათ რცხილაძე- “ევრაზიული ინსტიტუტი”-ს დამფუძნებელი.

მედიაფორუმს, თბილისში საპროტესტო აქციაც მოჰყვა. აღმოჩნდა, რომ მასში მონაწილეთა ნაწილმა, პროტესტის ნიშნად ფორუმი დატოვა, ნაწილი კი საერთოდ არ გამოცხადდა.

2018 წლის 4-7 სექტემბერს თბილისში, სასტუმრო Vere Palace-ში "საერთაშორისო სამხრეთ კავკასიური მედიაფორუმი" იმართება. წლევანდელი მედია ფორუმის თემაა "მედიის როლი რეგიონში ნდობის განმტკიცებაში".

ფორუმის საგანგებო სტუმარი რუსული სახელისუფლებო საინფორმაციო სააგენტოს “Россия сегодня-ს” (Russia Today/RT) პოლიტიკური მიმომხილველი დიმიტრი კოსირევია.

ფორუმზე მომხსენებელთა თავდაპირველი სია ასე გამოიყურებოდა:

ალექსეი ვიშნევეცკი – რუსეთის ჟურნალისტთა კავშირის თავმჯდომარის მოადგილე;

ვიქტორ ლიტოვკინი – „იტარ-ტასის“ სამხედრო მიმომხილველი ვიქტორ ლიტოვკინი;

გენადი ბორდიუგოვი – რუსი საზოგადოების მკვლევართა ასოციაციის საერთაშორისო საბჭოს პრეზიდენტი;

ალან კასაევი- გაზეთ „Северная Осетия“-ს მთავარი რედაქტორი;

ალექსეი მალაშენკო – МГИМО-ს პროფესორი, პოლიტოლოგი.

თუმცა, ოკუპაციის კანონის დარღვევის გამო, ქართველმა მესაზღვრეებმა დელეგაციის სამი წევრი ქვეყანაში არ შემოუშვეს. მათ შორის არიან რუსი საზოგადოების მკვლევართა ასოციაციის საერთაშორისო საბჭოს პრეზიდენტი გენადი ბოდრიუგოვი, რუსული გამოცემა Tass-ის სამხედრო მიმომხილველი ვიქტორ ლიტოვკინი და ალექს ტოკარევი.

მედიაფორუმის ორგანიზატორები არიან რუსეთის პოლიტოლოგიური ცენტრი „Север-Юг“, პრესკლუბი „თანამეგობრობა“ და გაზეთი „საქართველო და მსოფლიო“. ფორუმი რუსეთის საპრეზიდენტო გრანტების ფონდის მხარდაჭერით იმართება.