მამუკა ხაზარაძის გადაწყვეტილებას "შენების მოძრაობის" ლიდერი დავით უსუფაშვილი ეხმაურება. მისი შეფასებით, "თი ბი სი ბანკის" სამეთვალყურეო საბჭოს თავმჯდომარის თანამდებობიდან გადადგომით, ხაზარაძემ ივანიშვილის გამოწვევა მიიღო და ბიზნეს-პოლიტიკურ დუელში გაყვა.
"დღევანდელი გადაწყვეტილებით მამუკა ხაზარაძემ მიიღო ბიძინა ივანიშვილის გამოწვევა და მას სრულმასშტაბიან ბიზნეს-პოლიტიკურ დუელში გაყვა. ასეთ ბრძოლაში მას თიბისი ბანკის აქციონერების ინტერესები ტვირთად აწვებოდა. დღეს მან ამ ტვირთზე თქვა უარი და მეტი არაფერზე - არც ქონებაზე, არც ბიზნეს პერსპექტივაზე, არც პირად ღირსებაზე და, საბოლოო ჯამში, არც 27 წლის პირმშოზე. დუელის პროცესში კი ეს ყველაფერი სასწორზე იდება და გასაგებია, რისთვის იბრძოლებს ხაზარაძე. საკითხავი ისაა, რისთვის იბრძვის ივანიშვილი? ალბათ, ნიცშე, ფროიდი და ვებერიც კი მხოლოდ ერთობლივი ძალებით თუ გვიპასუხებდნენ ამ კითხვაზე...",- აცხადებს უსუფაშვილი.