ცნობილი ქართველი სამრეწველო დიზაინერი და საკონსტრუქტორო ბიურო „დელტა“-ს მთავარი დიზაინერი ზვიად ციკოლია, კომპანია „აი გრუპის“ ქართული ბრენდის ქვეშ გამოშვებული ელექტრომობილების დიზაინზე იმუშავებს.

პრეზენტაცია, დღეს 26 ივნისს გაიმართება, სადაც დანარჩენი დეტალები გახდება ცნობილი. ქარხნის მშენებლობა დაგეგმილია ქუთაისში. 

„აქტიურად ვარ ჩართული სამუშაო პროცესებში. ეს ჩვეულებრივი მსოფლიო სნტანდარტების შესაბამისი ელექტრომობილებია და განკუთვნილი იქნება არამარტო საქართველოსთვის, არამედ სხვა მოწინავე ქვეყნების ბაზრებისთვისაც“ - განაცხადა ცნობილმა დიზაინერმა ზვიად ციკოლიამ.

რამდენიმე დღის წინ ციკოლიამ, ელექრომობილების წარმოების შესახებ, სოციალურ ქსელში პოსტი და ფოტო გამოაქვეყნა:  

„ეს არის იმ ელექტრომობილის პროტოტიპი, რომლის წარმოება მალე დაიწყება საქართველოში. ტესტდრაივმა ჩაიარა სუპერ. მოკლედ ვისიამოვნე“ - წერს ზვიად ციკოლია.

შეგახსენებთ, რომ ზვიად ციკოლიამ 1986 წელს ფოთში, რესპუბლიკურ კონკურსზე სატვირთო მანქანის დიზაინის შექმნისათვის გრან-პრი აიღო. 1987 წელს მოსკოვში, „სახალხო მეურნეობის მიღწევათა გამოფენაზე“ წარადგინა ტრაილერის დიზაინი, რაშიც ბრინჯაოს მედალი მიიღო. 1993 წელს „Air Georgia“–ს მთავარი დიზაინერი გახდა.

1997 წელს მნიშვნელოვანი მიღწევა აქვს ფრანკფურტის ავტოსალონზე, სადაც წარადგინა სრულმასშტაბიანი „Bugatti“-ის მოდელი. 2001 წელს მიწვევა მიიღო კომპანია „Peugeot“-გან კონსულტანტის თანამდებობაზე.

2007 წელს მონაწილეობა მიიღო ელეგანტურობის კონკურსში, „Villa D'Este“ გამოფენაზე და ჟენევის საერთაშორისო ავტოსალონის გამოფენაზე. იმავე წლიდან იაპონური კომპანია „DCI“-ის მთავარი დიზაინერია. 2010 წლიდან მთავარი დიზაინერია ქართულ საკონსტრუქტორო ბიურო „დელტაში“,

სადაც პირველი ქართული ჯავშანტრანსპორტიორი დიდგორი 914-ის, დიდგორი მედევაკი-ის და ლაზიკას დიზაინი შექმნა.