თანამგზავრიდან ირანის ქალაქ ყუმში ფოტოები გადაიღეს, რომელზეც მასობრივი სამარხი ჩანს. გამოცემა Guardian-ი წერს, ეს არის იმის დასტური, რომ ირანში სიტუაცია გაცილებით უარესია, ვიდრე ამის შესახებ აცხადებენ. 

ფოტოები პირველად  New York Times-ში გამოქვეყნდა. მასზე ნაჩვენებია შიიტების წმინდა ქალაქი ყუმის ჩრდილოეთი ნაწილი, სადაც დაწყებულია სასაფლაოს ახალი ნაწილების გათხრები. გამოცემის ცნობით, თებერვლის ბოლოს ორი ახალი თხრილი დაემატა, რომელიც სიგრძეში დაახლოებით 91 მეტრია. 

24 თებერვალს, ყუმელმა კანონმდებელმა ირანის ჯანდაცვის სამინისტრო დაადანაშაულა იმაში, რომ მაშინ, როდესაც ისინი მხოლოდ 12 ადამიანის გარდაცვალებას აღიარებდნენ, კორონავირუსი უკვე მთელ ქვეყანაში იყო მოდებული.

ირანის ჯანდაცვის სამინისტროს ბოლო მონაცემებით 10 000-ზე მეტი ადამიანია დაინფიცირებული, გარდაცვლილთა რაოდენობა კი 429 არის.